شگفت گل کی صدا میں رنگ چمن میں آؤ
کوئی بھی رت ہو بہار کے پیرہن میں آؤ

shigoft-e-gul ki sada mein rang-e-chaman mein aao
koi bhi rut ho bahaar ke pairahan mein aao

शिगोफ़्त-ए-गुल की सदा में रंग-ए-चमन में आओ
कोई भी रुत हो बहार के पैरहन में आओ

کوئی سفر ہو تمہیں کو منزل سمجھ کے جاؤں
کوئی مسافت ہو تم مری ہی لگن میں آؤ

koi safar ho tumhein ko manzil samajh ke jaoon
koi musafat ho tum meri hi lagan mein aao

कोई सफ़र हो तुम्हें को मंज़िल समझ के जाऊँ
कोई मुसाफ़त हो तुम मेरी ही लगन में आओ

کبھی تو ایسا بھی ہو کہ لوگوں کی بات سن کر
مری طرف تم رقابتوں کی جلن میں آؤ

kabhi to aisa bhi ho ke logon ki baat sun kar
meri taraf tum riqabaton ki jalan mein aao

कभी तो ऐसा भी हो के लोगों की बात सुन कर
मेरी तरफ़ तुम रक़ाबतों की जलन में आओ

وہ جس غرور اور ناز سے تم چلے گئے تھے
کبھی اسی تمکنت اسی بانکپن میں آؤ

woh jis ghuroor aur naaz se tum chale gaye the
kabhi isi tamkanat isi baankpan mein aao

वह जिस ग़ुरूर और नाज़ से तुम चले गए थे
कभी इसी तमकिनत इसी बांकपन में आओ

یہ کیوں ہمیشہ مری طلب ہی تمہیں صدا دے
کبھی تو خود بھی سپردگی کی تھکن میں آؤ

ye kyun hamesha meri talab hi tumhein sada de
kabhi to khud bhi supurdagi ki thakan mein aao

ये क्यों हमेशा मेरी तलब ही तुम्हें सदा दे
कभी तो ख़ुद भी सुपुर्दगी की थकन में आओ

ہزار مفلس سہی مگر ہم سخی بلا کے
کبھی تو تم اہل درد کی انجمن میں آؤ

hazaar muflis sahi magar hum sakhi bala ke
kabhi to tum ahl-e-dard ki anjuman mein aao

हज़ार मुफ़लिस सही मगर हम सख़ी बला के
कभी तो तुम अहल-ए-दर्द की अंजुमन में आओ

ہم اہل دل ہیں ہماری اقلیم حرف کی ہے
کبھی تو جان سخن دیار سخن میں آؤ

hum ahl-e-dil hain hamari iqleem harf ki hai
kabhi to jaan-e-sukhan diyaar-e-sukhan mein aao

हम अहल-ए-दिल हैं हमारी इक़्लीम हर्फ़ की है
कभी तो जान-ए-सुख़न दियार-ए-सुख़न में आओ

کبھی کبھی دوریوں سے کوئی پکارتا ہے
فرازؔ جانی فرازؔ پیارے وطن میں آؤ

kabhi kabhi dooriyon se koi pukarta hai
faraz jaani faraz pyaare watan mein aao

कभी कभी दूरियों से कोई पुकारता है
फ़राज़ जानी फ़राज़ प्यारे वतन में आओ